Azərbaycan-İran hərbi əməkdaşlığı müzakirə olunur
Bakıda Azərbaycan Müdafiə Nazirliyi ilə İran Müdafiə və Silahlı Qüvvələrə Dəstək Nazirliyi arasında hərbi əməkdaşlıq üzrə birgə işçi qrupunun görüşü keçirilir. Tərəflər hərbi, hərbi-texniki, hərbi tibb və səhiyyə, hərbi-mülki əməkdaşlıq istiqamətlərini əhatələyən sahələri müzakirə edir. Oktyabrın 24-də başlayan görüş bu gün bitir.
Mod.gov.az-ın məlumatına görə, müdafiə naziri general-polkovnik Zakir Həsənov oktyabrın 24-də müdafiə və silahlı qüvvələrə dəstək nazirinin müavini, ikitərəfli hərbi əlaqələr və hərbi-texniki əməkdaşlıq üzrə birgə işçi qrupunun İran tərəfdən rəhbəri general-mayor Höccətullah Qüreyşinin rəhbərlik etdiyi nümayəndə heyəti ilə görüşüb. Zakir Həsənov Dağlıq Qarabağ və ətraf rayonların uzun illərdir Ermənistanın işğalı altında olduğunu, bunun nəticəsində bir milyondan çox insanın didərgin düşdüyünü xatırladıb, Ermənistanın cəbhədə vəziyyəti gərginləşdirmək cəhdlərindən danışıb.
Azərbaycanla İran arasında hərbi sahədə əməkdaşlığın vəziyyətindən məmnunluq hissi ifadə edən Höccətullah Qüreyşi bu münasibətlərin inkişafında hərbi mütəxəssislərin qarşılıqlı səfərlərinin əhəmiyyətini qeyd edib.
Cənubi Qafqazda hərbi-siyasi vəziyyət, o cümlədən Dağlıq Qarabağ probleminə toxunan qonaq münaqişənin sülh yolu ilə həllinin vacibliyini vurğulayaraq İranın Azərbaycanın ərazi bütövlüyünü daim dəstəklədiyini diqqətə çatdırıb.
Görüşdə iki ölkənin hərbi sahədə əməkdaşlığının mövcud vəziyyəti və perspektivləri, Xəzər dənizi hövzəsində təhlükəsizlik məsələləri ətrafında fikir mübadiləsi aparılıb.
