205 azərbaycanlıdan 68-i uğur qazanıb
Gürcüstanda yerli orqanlara oktyabrın 21-də keçirilmiş seçkilərdə 67 azərbaycanlı deputat mandatı qazanıb, 1 nəfər isə Marneuli rayonunun meri seçilib.
AZƏRTAC xəbər verir ki, seçkilərdə mübarizə aparan 205 azərbaycanlının 165-i hakim Gürcü Arzusu – Demokratik Gürcüstan Partiyasının namizədləri olub.
Azərbaycanlıların ən çox yaşadıqları Marneuli rayonunda bələdiyyəyə seçilən 35 nəfərin 19-u azərbaycanlıdır. Mer postunu isə Teymur Abbasov tutub.
Bolnisi rayonunda namizədlər 30 yer uğrunda mübarizə aparıblar. Bu rayonda 11 azərbaycanlı qələbə qazanıb.
Qardabani bələdiyyəsinə seçilən 36 nəfərdən 15-i azərbaycanlıdır.
Dmanisi rayon yerli özünüidarəetmə orqanına seçilən 29 nəfərdən 14-ü azərbaycanlıdır.
Saqareco bələdiyyəsinə 4 nəfər, Laqodexi bələdiyyəsinə isə 1 nəfər azərbaycanlı deputat seçilib.
Azərbaycanlıların yığcam yaşadıqları Telavi rayonunda (Qaracalar kəndi), Tetriçxalo rayonunda (Kosalar), Kaspi rayonunda (Ferma kəndi) 1 azərbaycanlı deputat mandatı qazanıb.
Paytaxt Tbilisi və ikinci ən böyük şəhər Kutaisidə azərbaycanlı namizəd olmayıb.
Novator.az xatırladır ki, oktyabrın 21-də Gürcüstan əhli 5 şəhər və 59 rayon üzrə mer, 64 bələdiyyə üzrə məclis seçkilərinə qatılıb. Marafonda 22 partiya və 5 blok iştirak edib.
58 mer postu hakim partiyaya qismət olub. 1 şəhər və 5 rayonda ikinci tur təyin edilib.
Bələdiyyə məclislərində də çoxluğu Gürcü Arzusu – Demokratik Gürcüstan Partiyası əldə edib.
Hakim Gürcü Arzusu – Demokratik Gürcüstan Partiyası parlamentdəki 150 yerdən 115-nə sahibdir.
