Real olan nədir?
Respublikaçı Alternativ (REAL) Hərəkatı Bakı Şəhər İcra Hakimiyyətindən cavab ala bilmir. Partiyaya çevrilmək qərarı verən qurum oktyabrın 2-də meriyaya müraciət edərək təsis qurultayı üçün ya “Təbriz” və “Bakı” kinoteatrlarından birini, ya da Əmircan qəsəbəsindəki mədəniyyət sarayının ayrılmasını istəyib.
REAL-ın üzvü Azər Qasımlı oktyabrın 24-də Novator.az-a deyib ki, müraciətin taleyi ilə maraqlanıblar, meriyadan cavab göndəriləcəyi deyilib: “Bunu kim, haçan edəcək – demirlər. Amma qurultay hər bir halda keçiriləcək, buna heç kəsin şübhəsi olmasın. Qurultay son mərhələdir, bütün işlər, texniki məsələlər həllini tapıb, nümayəndələr seçilib. Yer verilən kimi qurultay keçiriləcək.
Yer üçün alternativ məkanlar da axtarırıq. Bir aydır axtarış gedir. Ancaq heç kəs yer vermək istəmir, cəmiyyət qorxu içindədir. Hər bir halda, hökumətin təqdim etdiyi və ya başqa bir məkanda, qurultay keçiriləcək”.
REAL qurultayı oktyabrın 29-na təyin edib.
2008-ci ildə yaradılmış REAL Hərəkatının lideri İlqar Məmmədov 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 7 il azadlıqdan məhrumetmə cəzası alıb.
