Müsavat növbəti aksiyaya qərar verib
Müsavat Partiyası noyabrın 3-də Bakı Şəhər İcra Hakimiyyətinin binası qarşısında piket keçirmək barədə qərar qəbul edib.
Partiyanın başqanı Arif Hacılı Toplum.Tv-yə deyib ki, meriya Müsavatın oktyabr 21-nə təyin etdiyi yürüşə razılıq verməyib və beləliklə, “Sərbəst toplaşma azadlığı haqqında” qanunu, konstitusiya müddəalarını kobud surətdə pozub. Piket qərarı buna etiraz əlaməti olaraq qəbul edilib. Partiya piketlə bağlı artıq Bakı Şəhər İcra Hakimiyyətinə rəsmi müraciət də göndərib.
Arif Hacılı hesab edir ki, bu müraciətə mənfi cavab vermək üçün heç bir əsas yoxdur.
Müsavat Partiyası oktyabrın 21-də “Azadlıq prospekti” stansiyasının çıxışından “Dərnəgül” stansiyasının qarşısındakı meydanadək və ya 20 saylı məktəbin yaxınlığındakı meydandan Hüseyn Cavid bağındakı meydanadək olan marşrutların birində yürüş keçirmək istəyirdi. Aksiyanın “Qarabağa azadlıq!”, “Siyasi məhbuslara azadlıq!”, “Xalqdan oğurlanan milyardlar geri qaytarılsın!”, “Sərbəst toplaşmaq azadlığı təmin edilsin!” və digər şüarlarla keçirilməsi nəzərdə tutulurdu.
Ancaq Bakı Şəhər İcra Hakimiyyəti yürüşə razılıq verməyib və Müsavata oktyabrın 21-də Yasamal rayonundakı İdman-Sağlamlıq Kompleksinin stadionunda mitinq keçirməyi təklif edib.
İcra hakimiyyəti yürüşə razılıq verməməsini aksiyanın nəqliyyat və piyadaların hərəkətinə mane olacağı ehtimalı ilə izah edib. Müsavat isə bunu bəhanə və yürüşlərin faktiki qadağan olunması kimi qiymətləndirir.
