Neft və qazsız ixrac 14 faizə çatmır
Bu ilin 9 ayında Azərbaycandan ixracın 86,57 faizi neft-qaz sektoruna aid olub. Novator.az bildirir ki, yanvar-sentyabr aylarında ixracın 72,24 faizini xam neft, 2,93 faizini neft məhsulları, 11,4 faizini təbii qaz təşkil edib.
Dövlət Gömrük Komitəsinin hesabatına görə, 9 ayda xam neft ixracında 20 faiz, neft məhsullarının ixracında 10,18 faiz azalma var.
Təbii qaz ixracı 0,61 faiz çoxalıb.
Hesabata əsasən, ixracın 3,76 faizi meyvə-tərəvəzdir. Meyvə-tərəvəz ixracında 41,49 faiz artım qeydə alınıb.
2017-ci ilin 9 ayında idxalın 21,56 faizi maşın, mexanizm, elektrik aparatları, avadanlıqlar və onların hissələri olub.
Yeyinti məhsulları ümumi həcmin 15,73 faizini təşkil edib. 2016-cı ilin yanvar-sentyabr ayları ilə müqayisədə yeyinti məhsullarının idxalında 2,3 faiz artım var.
Ət idxalı 91,57 faiz, süd idxalı 69,02 faiz, kərə yağı və süddən hazırlanmış digər yağların idxalı 27,65 faiz artıb.
Ümumi idxalın 14,03 faizi nəqliyyat vasitələri və onların hissələri, 9,03 faizi qara metallar və onlardan hazırlanan məmulatlardır.
