Neft Fondunun sərvəti
Dövlət Neft Fondu (DNF) 9 aylıq hesabat yayıb. Novator.az-a verilən rəsmi məlumata görə, 2017-ci ilin yanvar-sentyabr aylarında büdcə gəlirləri 8 milyard 793,4 milyon manat, xərclər 6 milyard 911,7 milyon manat olub.
Hesabat dövrü ərzində 4 milyard 300 milyon manat vəsait dövlət büdcəsinə transfert edilib. Qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin həyata keçirilməsinə 82,5 milyon manat, Samur-Abşeron suvarma sisteminin yenidən qurulmasına 39,5 milyon manat, Bakı-Tbilisi-Qars dəmir yolu layihəsinin maliyyələşdirilməsinə 17,2 milyon manat vəsait ayrılıb.
11,2 milyon manat vəsait 2007-2015-ci illərdə Azərbaycan gənclərinin xarici ölkələrdə təhsili üzrə dövlət proqramının maliyyələşdirilməsinə yönəldilib.
Makroiqtisadi sabitliyin təmin edilməsi məqsədi ilə Mərkəzi Banka 2 milyard 448,3 milyon manat köçürülüb.
9 ayda DNF-nin idarə edilməsi ilə bağlı xərcləri 13 milyon manat təşkil edib.
2017-ci il oktyabrın 1-nə fondun aktivləri 2017-ci ilin əvvəlinə nisbətən 8,67% artaraq 36 milyard 20 milyon ABŞ dollarına bərabər olub.
