İranla yeni müzakirələr
İstanbul səfərində olan dövlət başçısı İlham Əliyev oktyabrın 19-da İranın birinci vitse-prezidenti İshaq Cahangiri ilə görüşüb. Görüşdə Azərbaycanla İran arasında energetika, əczaçılıq, sərmayə qoyuluşu, sənaye, o cümlədən birgə avtomobil istehsalı və digər sahələrdə əməkdaşlığın yaxşı perspektivləri olduğu bildirilib və əlaqələrin inkişafına dair fikir mübadiləsi aparılıb.
AZƏRTAC xəbər verir ki, İlham Əliyev ikitərəfli münasibətlərin uğurla inkişaf etdiyini bildirib, siyasi əlaqələrin yüksək səviyyədə olduğunu vurğulayıb. Prezident iqtisadi əməkdaşlığın genişləndiyini, iki ölkə arasında mühüm infrastruktur layihələrinin həyata keçirildiyini qeyd edib.
İshaq Cahangiri iqtisadi əməkdaşlığın uğurla inkişaf etdiyini deyib, Astara-Astara dəmir yolu xəttinin həm ikitərəfli sahədə, həm də bölgədə əməkdaşlıq baxımından əhəmiyyətini qeyd edib.
İran rəsmisi regionda terrorizm təhdidlərinin olduğunu söyləyib və buna qarşı mübarizədə ölkələrin səylərinin artırılmasının əhəmiyyətindən danışıb.
İlham Əliyev Astara-Astara dəmir yolu layihəsinə dünyada böyük marağın olduğunu vurğulayaraq bildirib ki, bu layihə bölgədə iqtisadi əməkdaşlığın inkişafına xidmət edir.
Dövlət başçısı deyib ki, Azərbaycan beynəlxalq terrorizmə qarşı fəal mübarizə aparan ölkələrdəndir və bu sahədə səylərini əsirgəmir.
Azərbaycan prezidenti İstanbula Türkiyə prezidenti Rəcəb Teyyub Ərdoğanın dəvəti ilə, “İnkişafda olan səkkizlər”in (D-8) zirvə görüşündə xüsusi qonaq qismində iştirak etmək üçün gedib. D-8-ə Türkiyə, İran, Pakistan, Banqladeş, Malayziya, İndoneziya, Misir və Nigeriya daxildir.
