Güzəştli kreditlərin həcmi 100 milyon manatı ötdü
İqtisadiyyat Nazirliyinin Sahibkarlığa Kömək Milli Fondu oktyabrın 19-u Ağdaşın Qulbəndə kəndində işgüzar forum keçirib. Rəsmi məlumata görə, forumda Aran iqtisadi rayonunun sahibkarlıq subyektlərinə 10,7 milyon manat güzəştli kredit verilib. Heyvandarlıq, əkinçilik, quşçuluq, mebel istehsalı və sair sahələrin inkişafına yönəldiləcək kreditlərin hesabına 400-dən çox yeni iş yerinin açılacağı bildirilir.
Bununla da Aran iqtisadi rayonunda verilən güzəştli kreditlərin həcmi 542,5 milyon manata çatıb. 2017-ci ildə sahibkarların aldığı güzəştli kreditlərin həcmi isə 100 milyon manatı ötüb. 19 oktyabr forumunadək sahibkarlıq subyektləri 97 milyon manatadək güzəştli kredit almışdı.
Novator.az xatırladır ki, Nazirlər Kabinetinin 9 oktyabr iclasında prezident İlham Əliyev güzəştli kreditlər məsələsinə də toxunub: “Hazırda sahibkarlara verilən güzəştli kreditlərin demək olar ki, tam həcmi əvvəllər verilmiş və qaytarılmış kreditlər hesabına təşkil edilir. Bu il kifayət qədər böyük proqram nəzərdə tutulub. Proqramın böyük hissəsi icra edilib. Amma hələ də Sahibkarlığa Kömək Milli Fondunun sərəncamında kifayət qədər vəsait – bölüşdürülməmiş, yaxud da bölüşdürülmüş, ancaq verilməmiş kreditlər var. Çalışmaq lazımdır ki, ilin sonuna qədər nəzərdə tutulmuş kreditləşmə tam həcmdə təmin edilsin”.
