Prezident İlham Əliyev İstanbula gedib
Oktyabrın 19-da prezident İlham Əliyev Türkiyə prezidenti Rəcəb Teyyub Ərdoğanın dəvəti ilə “İnkişafda olan səkkizlər”in (D-8) zirvə görüşündə xüsusi qonaq qismində iştirak etmək üçün İstanbula gedib.
AZƏRTAC xəbər verir ki, İstanbulun Atatürk beynəlxalq hava limanında prezident İlham Əliyevi İstanbul valisi Vasip Şahin və digər rəsmi şəxslər qarşılayıblar.
D-8 formatına Türkiyə, İran, Pakistan, Banqladeş, Malayziya, İndoneziya, Misir və Nigeriya daxildir. Təşkilatın üzvlərindən ikisi – Türkiyə və İndoneziya “Böyük iyirmilər”in (G-20) üzvüdür.
D-8-in yaranması ideyası İslam Əməkdaşlıq Təşkilatının 1996-cı il oktyabrın 22-də İstanbulda keçirilmiş toplantısı çərçivəsində meydana çıxıb. Bir il sonra İstanbul zirvə toplantısı ilə D-8 təsis olunub.
Hazırda təşkilatı zirvə, şura və komissiyalardan ibarət 3 rəhbər struktur idarə edir.
2017-ci il oktyabrın 19-da İstanbulda D-8-in Nazirlər Şurasının 17-ci iclası keçirilib. İclasda D-8-ə sədrlik Pakistandan Türkiyəyə keçib.
Nazirlər Şurasının iclasında təşkilatın ötən dövrdəki fəaliyyətinə nəzər yetirilib, üzv ölkələr arasında ticarət, sənaye, nəqliyyat, informasiya, maliyyə, qlobal iqtisadiyyatda əməkdaşlıq, bank işləri, texnologiyalar, yoxsulluqla mübarizə, insan resursları, kənd təsərrüfatı, enerji, səhiyyə, turizm, mədəniyyət, idman sahələrində əməkdaşlığın vəziyyəti və perspektivlər müzakirə olunub.
D-8-in dövlət və hökumət başçılarının IX zirvəsi oktyabrın 20-də keçiriləcək.
Qurumun baş katibi Seyid Əli Məhəmməd Musəvidir.
