Arif Hacılı meriyanın cavabına münasibət bildirdi
Müsavat Partiyasının başqanı Arif Hacılı partiyanın oktyabrın 21-nə təyin etdiyi yürüşlə bağlı Bakı Şəhər İcra Hakimiyyətindən aldıqları cavaba münasibət bildirib.
Meriya partiyanın yürüşlə bağlı müraciətini oktyabrın 19-da cavablandırıb. Yürüşə razılıq verilməyib, oktyabrın 21-də Yasamal rayonundakı İdman-Sağlamlıq Kompleksinin stadionunda mitinq keçirmək təklif olunub.
Novator.az-ın məlumatına görə, Arif Hacılı cavab məktubunu alandan az sonra Facebook şəbəkəsində yazıb: “Müsavat Partiyasının 21 oktyabra elan etdiyi kütləvi aksiyanın keçirilməsinə icazə verilmədi. İlham Əliyev ölkədə sərbəst toplaşma azadlığının tam təmin olunması haqqında dediyi sözün arxasında durmadı”.
Partiya yürüşü “Azadlıq prospekti” stansiyasının çıxışından “Dərnəgül” stansiyasının qarşısındakı meydanadək və ya 20 saylı məktəbin yaxınlığındakı meydandan Hüseyn Cavid bağındakı meydanadək olan marşrutların birində keçirmək istəyirdi. Aksiyanın “Qarabağa azadlıq!”, “Siyasi məhbuslara azadlıq!”, “Xalqdan oğurlanan milyardlar geri qaytarılsın!”, “Sərbəst toplaşmaq azadlığı təmin edilsin!” və digər şüarlarla keçirilməsi nəzərdə tutulurdu.
