500 min avro daşdan çıxdı
Azərbaycanın “Qarabağ” futbol klubu UEFA Çempionlar Liqasının qrup mərhələsində ilk xalını qazanıb. Novator.az-ın məlumatına görə, C qrupunda yarışan Ağdam təmsilçisi oktyabrın 18-i Bakı Olimpiya Stadionunda İspaniyanın “Atletiko” komandasını qəbul edib. Ümumən bərabər səviyyədə keçən gərgin oyunda hesab açılmayıb. Hakimin yanlış qərarı üzündən “Qarabağ” 75-ci dəqiqədən meydanda bir oyunçu əskik qalsa da, davam gətirib.
Çempionlar Liqasının qrup mərhələsində heç-heçəyə UEFA 500 min avro mükafat verir.
Qrupun digər oyununda da heç-heçə qeydə alınıb. İngiltərənin “Çelsi” komandası evdə İtaliya “Roma”sı ilə xalları bölüb – 3:3.
“Qarabağ” əvvəlki oyunlarda “Çelsi”yə 0:6, “Roma”ya 1:2 hesabı ilə uduzmuşdu.
Üç turdan sonra “Çelsi” 7 xalla liderdir. “Roma” 5 xalla ikinci, “Atletiko” 2 xalla üçüncü, “Qarabağ” 1 xalla sonuncu pillədə dayanır.
Qrup mərhələsindən növbəti raunda adlamaq üçün ən azı ikinci yeri tutmaq gərəkdir. Üçüncü yeri tutan Avropa Liqasına transfer olunur.
C qrupunda digər oyunların təqvimi:
31 oktyabr
“Atletiko” – “Qarabağ”
“Roma” – “Çelsi”
22 noyabr
“Qarabağ” – “Çelsi”
“Atletiko” – “Roma”
5 dekabr
“Çelsi “– “Atletiko”
“Roma” – “Qarabağ”.
