Şahbaz Quliyevin vəziyyəti barədə yeni məlumat
Oktyabrın 18-də Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası açıqlama yayıb. Açıqlamada deyilir: “Aidiyyəti beynəlxalq təşkilatlardan verilmiş məlumata əsasən, 2014-cü ilin iyul ayında Ermənistan silahlı birləşmələrinin işğal olunmuş Kəlbəcər rayonunda girov götürdüyü və separatçı Dağlıq Qarabağ rejiminin qeyri-qanuni məhkəməsinin azadlıqdan məhrum etdiyi Quliyev Şahbaz Cəlal oğlu bu ilin avqust ayında müayinə məqsədilə aparıldığı Ermənistan Respublikasının Yerevan şəhərindən əvvəlki saxlanma yerinə qaytarılıb. Saxlanma yerinə qaytarılma prosesi 2017-ci il oktyabrın 16-da həyata keçirilib.
Məlumata əsasən, zəruri müayinə prosedurlarını keçmiş Şahbaz Quliyevin səhhətində hər hansı problem aşkar edilməyib və sağlıq durumu normal vəziyyətdədir.
Şahbaz Quliyev müayinə üçün Yerevan şəhərinə aparılarkən və saxlanma yerinə geri qaytarılarkən müvafiq prosedurlara uyğun olaraq dövlət komissiyası məlumatlandırılıb”.
Şahbaz Quliyev Dilqəm Əsgərov və Həsən Həsənovla birgə 2014-cü il iyulun 11-də Azərbaycanın işğal altında olan Kəlbəcər rayonunda öz ata-baba yurdlarını ziyarət edərkən işğalçı qüvvələrin hücumuna məruz qalıb. Həsən Həsənov öldürülüb, Şahbaz Quliyev və Dilqəm Əsgərov isə girov götürülüb.
Dağlıq Qarabağdakı qondarma rejim Dilqəmlə Şahbaz üzərində qanunsuz “məhkəmə” qurub. “Məhkəmə”nin qərarı ilə Dilqəm Əsgərov ömürlük, Şahbaz Quliyev 22 il müddətinə azadlıqdan məhrum edilib.
Dilqəm və Şahbaz indiyədək işğal olunmuş ərazilərdə erməni əsirliyində saxlanır.
