Narkotiklərlə mübarizə: 9 ayın rəqəmləri
Hüquq mühafizə orqanları bu ilin doqquz ayında narkotiklərlə mübarizə sahəsində 2373 fakt aşkar edib. Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasından AZƏRTAC-a bildiriblər ki, onlardan 678-i satış məqsədilə qanunsuz olaraq narkotik vasitələri, psixotrop maddələri və ya prekursorları əldə etmə, saxlama, daşıma, göndərmə və ya satma halları ilə bağlı olub.
Satış məqsədi olmadan narkotik vasitələri, psixotrop maddələri və onların prekursorlarını qanunsuz olaraq əldə etmə və saxlama üzrə 1455 fakt, qanunsuz olaraq narkotik xassəli bitkiləri kultivasiya etmə üzrə 196 fakt, digərlər hallar üzrə 44 fakt üzə çıxıb.
Qanunsuz dövriyyədən ümumi çəkisi 1 ton 25 kiloqram 434,074 qram müxtəlif növ narkotik vasitələr və psixotrop maddələr, o cümlədən 12 min 670 çətənə kolu, 8 kiloqram 915,4 qram güclü təsir edən maddə, 58 kiloqram 162,7 qram zəhərli maddə müsadirə olunub.
Cinayət məsuliyyətinə 1955 nəfər cəlb olunub. Onları 4-ü 18 yaşadək, 154-ü 18-25, 281-i 26-29 yaşlarındadır.
Məsuliyyətə cəlb olunan şəxslərdən 764-ü təkrar cinayət törətmiş şəxslər, 1926-sı kişi, 29-u qadın, 36-sı xarici ölkə vətəndaşlarıdır. Onlardan ümumilikdə 112 kiloqramdan artıq narkotik vasitə və psixotrop maddələr götürülüb.
