Ev alan jurnalistlərlə görüş keçiriləcək
Bakının Bibiheybət qəsəbəsində jurnalistlər üçün tikilmiş yeni binadan mənzil almış şəxslərlə görüş keçiriləcək. Novator.az-a açıqlama verən “Jurnalist evi” MMC-nin direktoru Bünyamin İsmayılov deyib ki, görüşdə mənzillərin bağışlanması müqavilələri bağlanacaq.
Görüşün harada keçiriləcəyinə gəlincə, Bünyamin İsmayılov bildirib ki, bu, rəhbərliyin göstərişindən asılıdır: “Görüş Kütləvi İnformasiya Vasitələrinin İnkişafına Dövlət Dəstəyi Fondunda (Mətbuat prospekti, 529-cu məhəllə) və ya yeni binanın özündə keçirilə bilər. Bu, rəhbərliyin göstərişi ilə həll olunacaq”.
Görüşün nə vaxt keçiriləcəyi hələ bilinmir. Məsələ konkretləşəndə tarix açıqlanacaq.
Yeni jurnalist binasının açılışı iyulun 20-də olub. Binada 255 mənzil var.
Bünyamin İsmayılov deyib ki, bütün təmir işləri, müxtəlif təşkilatlarla aparılan sənədləşmə prosesi yekunlaşıb və bina istifadəyə hazır vəziyyətdədir: “Bircə qaz xəttinin ümumi şəbəkəyə qoşulması qalır. Bunun üçün mənzillərin heç olmasa yarısında yaşayış olmalıdır”.
156 mənzilli ilk bina 4 il əvvəl media işçilərinə təqdim olunub.
Hər iki yaşayış binası prezident İlham Əliyevin sərəncamları ilə dövlət vəsaiti hesabına inşa edilib. Mənzillər jurnalistlərə pulsuz verilir.
Dövlət başçısının kütləvi informasiya vasitələri əməkdaşlarının sosial müdafiəsinin gücləndirilməsinə dair iyulun 19-da imzaladığı sərəncama əsasən Bibiheybət qəsəbəsində jurnalistlər üçün daha bir yaşayış binası tikilir.
