Zakir Həsənov Hulusi Akarla görüşüb
Azərbaycanın müdafiə naziri general-polkovnik Zakir Həsənov oktyabrın 17-si Tbilisidə Türkiyə Respublikasının Baş Qərargah rəisi ordu generalı Hulusi Akarla görüşüb. Müdafiə sahəsində əməkdaşlığın daim inkişaf etdiyini vurğulayan tərəflər iki ölkə arasında qarşılıqlı etimada əsaslanan hərbi əlaqələrin bölgədə sülhün və sabitliyin, davamlı inkişafın təmin olunması baxımından mühüm rol oynadığını deyiblər.
Mod.gov.az-ın məlumatına görə, Dağlıq Qarabağ münaqişəsinin həlli istiqamətində Azərbaycanın mövqeyinin dəstəkləndiyi qeyd olunan görüşdə terrorizmə və separatizmə qarşı mübarizədə hərbi əməkdaşlığın inkişafı və bu məsələlərdə qarşılıqlı dəstəyin vacib olduğu bir daha vurğulanıb.
Cənubi Qafqazda sabitliyin, o cümlədən regional layihələrin təhlükəsizliyinin təmin edilməsində hər iki ölkənin Silahlı Qüvvələrinin rolunun əhəmiyyətli olduğu bildirilib, ikitərəfli hərbi əlaqələrin möhkəmlənməsi və təcrübə mübadiləsinin genişləndirilməsinin vacibliyi diqqətə çatdırılıb.
Görüşdə hərbi, hərbi təhsil, hərbi-texniki sahələrdə əməkdaşlığın perspektivləri müzakirə olunub, iki ölkə arasında keçirilən hərbi təlimlərə Gürcüstanın da cəlb olunmasının əhəmiyyəti vurğulanıb və qarşılıqlı maraq doğuran digər məsələlər barədə ətraflı fikir mübadiləsi aparılıb.
