Korrupsiyadan yazan jurnalist öldürüldü
Maltada jurnalist Dafne Karuana Qalisiya öldürülüb. Oktyabrın 16-sı axşam onun avtomobili partladılıb. Avtomobilə bomba yerləşdirilibmiş.
Novator.az bildirir ki, Dafne Karuana Qalisiya ölkənin baş naziri Cozef Muskatı Panamada ofşor şirkət əldə etməkdə, Azərbaycan hakimiyyətindən pul almaqda günahlandıran yazıların müəllifidir. Yazılarda Azərbaycan prezidentinin və onun ailə üzvlərinin də adları hallandırılıb.
Jurnalistin qalmaqallı yazılarından sonra Maltada növbədənkənar parlament seçkisi keçirilib. İyunun 3-də keçirilmiş seçkidə hakim Leyborist Partiyası qalib gəlib və 43 yaşlı Cozef Muskat yenidən baş nazir kürsüsünə oturub.
Məlumata görə, jurnalist ölümündən 15 gün əvvəl polisə hədələndiyi barədə şikayət edibmiş.
53 yaşlı Dafne Karuana Qalisiyanın qətlə yetirilməsi böyük əks-səda doğurub.
Baş nazir Cosef Muskat hadisəni pisləyib: “Mən bu vəhşi hərəkəti qətiyyətlə pisləyir, bunu ölkəmizdə şəxsiyyət və ifadə azadlığı üzərinə basqın hesab edirəm. Hamı bilir ki, xanım Karuana Qalisiya həm siyasi, həm də şəxsi müstəvidə mənim və başqalarının qatı tənqidçisi idi. Ədalət öz yerini tutmayınca mən sakit olmayacam”.
Hazırladı: Teymur Hüseynov,
16 yaş, Gəncə
