Bakıdan Amerikaya çağırış
2017-ci ildə Azərbaycanla ABŞ arasında ticarət dövriyyəsi 7 faiz artıb. Oktyabrın 16-da İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə keçirilən biznes forumunda belə məlumat verilib.
Novator.az Economy.gov.az-a istinadla bildirir ki, tədbirdə rəsmi şəxslər, kənd təsərrüfatı və qida sənayesi, sənaye, maliyyə, İKT, səhiyyə, tikinti, logistika və xidmət sahələrində fəaliyyət göstərən 150-ə yaxın iş adamı iştirak edib. Forumda çıxış edən iqtisadiyyat nazirinin müavini Sahil Babayev Azərbaycanın ABŞ-la iqtisadi-ticarət əlaqələri barədə məlumat verib. O bildirib ki, 2017-ci ilin səkkiz ayında iki ölkə arasında ticarət dövriyyəsi ötən ilin müvafiq dövrü ilə müqayisədə 7 faiz artıb. Qeyd edilib ki, indiyədək ABŞ şirkətləri Azərbaycan iqtisadiyyatına 12,7 milyard dollar dəyərində investisiya yatırıb, Azərbaycanın ABŞ-a yatırdığı investisiyaların həcmi isə 3 milyard dollardır.
Sahil Babayev energetika, sənaye, kənd təsərrüfatı, təhsil sektorları və başqa sahələrdə ABŞ-la uğurlu əməkdaşlığın davam etdirildiyini vurğulayıb, ABŞ şirkətlərini Azərbaycanda yaradılan sənaye parkları və sənaye zonalarında təklif edilən imkanlardan yararlanmağa çağırıb.
Amerika Birləşmiş Ştatlarının Azərbaycandakı səfiri Robert Sekuta iki ölkə arasında iqtisadi əlaqələrin daha da genişləndirilməsi üçün mövcud potensialdan səmərəli istifadənin, iş adamları arasında əlaqələrin genişləndirilməsinin ABŞ-Azərbaycan iqtisadi-ticarət əməkdaşlığının inkişafında əhəmiyyətini, iqtisadi əlaqələrin inkişaf istiqamətlərini diqqətə çatdırıb.
Tədbirdə iş adamları arasında ikitərəfli görüşlər olub, əlaqələrin genişləndirilməsi və yeni biznes əməkdaşlığının qurulması məsələləri müzakirə edilib.
