Araz Əlizadə yenidən partiya sədri seçildi
Oktyabrın 15-də Azərbaycan Sosial Demokrat Partiyasının (ASDP) XIII qurultayı keçirilib.
Partiyanın mətbuat xidmətindən Novator.az-a verilən məlumata görə, qurultayda hesabat dövrü ərzində ASDP-nin fəaliyyəti müzakirə olunub və mərkəzi orqanlara seçki keçirilib.
Araz Əlizadə yenidən ASDP-nin sədri seçilib.
Təhməz Məmmədov təşkilat məsələləri, Səməd Əlizadə beynəlxalq məsələlər üzrə sədr müavini postlarını tutublar.
Partiya sədrinin müavini postuna daha iki şəxs seçilib: Qadın Sosial Demokrat Təşkilatının sədri Günel Babayeva və Sosial Demokrat Gənclər Təşkilatının sədri Cavanşir Əsədov.
ASDP Mərkəzi Komitəsi 11 nəfərdən ibarət tərkibdə formalaşdırılıb.
Araz Əlizadə 1951-ci ildə Bakı şəhərində doğulub. 1974-cü ildə indiki Bakı Dövlət Universitetinin şərqşünaslıq fakültəsini bitirib. 1975-1976-cı illərdə Əfqanıstanda tərcüməçi işləyib. 1979-cu ildən Ukrayna Elmlər Akademiyasının Tarix İnstitutunda kiçik elmi işçi olub, eləcə də Kiyev Xarici Dillər Pedaqoji İnstitutunda dərs deyib.
O, 1985-ci ildə siyasi baxışlarına görə mühakimə olunub. 1987-ci ildə Bakıya qayıdıb. 1989-cu ildən Azərbaycan Sosial Demokrat Partiyasına liderlik edir. 1991-1995-ci illərdə Azərbaycan Ali Sovetinin deputatı olub. 2015-ci ildə Milli Məclisin deputatı seçilib.
Təhməz Məmmədov 1947-ci ildə anadan olub. 1972-ci ildə indiki Bakı Dövlət Universitetinin jurnalistika fakültəsini, 1987-ci ildə Bakı Ali Partiya Məktəbini (hazırda Azərbaycan Prezidenti yanında Dövlət İdarəçilik Akademiyası) bitirib.
Səməd Əlizadə 1988-ci ildə anadan olub. 2009-cu ildə Azərbaycan Dövlət İqtisad Universitetinin maliyyə-kredit fakültəsini bitirib. Daha sonra Qərb Universitetində bank işi ixtisası üzrə magistratura təhsili alıb. Hazırda Qərb Universitetinin dissertantıdır.
Günel Babayeva 1987-ci ildə anadan olub. 2008-ci ildə Bakı Dövlət Universitetinin psixologiya fakültəsini bitirib.
Cavanşir Əsədov 1996-cı ildə anadan olub. 2017-ci ildə Azərbaycan Dövlət İqtisad Universitetinin biznesin idarə olunması fakültəsini bitirib. Hazırda Azərbaycan Dövlət Neft və Sənaye Universitetində sənayenin təşkili və idarə edilməsi ixtisası üzrə magistr təhsili alır.
