Prezident seçkisini prezidentin müttəfiqi udur
Qırğızıstanda oktyabrın 15-də keçirilmiş prezident seçkisinin ilkin nəticələri açıqlanıb. Novator.az-ın məlumatına görə, hakim Sosial Demokrat Partiyasının namizədi, sabiq baş nazir Sooronbay Jeenbekov 54,8 faiz səslə önə çıxıb. Onun ən yaxın rəqibi – əvvəllər baş nazir olmuş müxalifətçi Omurbek Babanov 33,7 faizlə ikinci yerdə gedir.
Baş nazirin sabiq müavini Adaxan Madumarov 6,5 faiz, keçmiş baş nazir Temir Sariyev 2,6 faiz səs yığıb. Qalan 7 namizəd 1 faiz səsə belə çata bilməyib.
1958-ci il təvəllüdlü Sooronbay Jeenbekov baş nazir postunu 2016-2017-ci illərdə tutub. O, indiki prezident Almazbek Atambayevin yaxın silahdaşı sayılır.
Dövlət başçısı olan prezident 6 il müddətinə seçilir. Heç kim bir dəfədən artıq prezident seçilə bilməz. İndiki prezident Almazbek Atambayev 2011-ci ildən bu postdadır.
Qırğızıstanda ali icraedici orqan hökumətdir. Hökuməti 120 yerlik parlamentdə deputatların yarıdan çoxunu təşkil edən fraksiya və ya koalisiya qurur.
