Festivala 500-dən artıq ticarət obyekti qoşulur
Oktyabrın 15-də II Bakı Ticarət Festivalı start götürüb. Azərbaycan Konqreslər Bürosundan AZƏRTAC-a bildirilib ki, noyabrın 15-dək davam edəcək festivala 500-dən artıq ticarət obyekti qoşulur. “Baku Shopping Festival – Tax Free” nişanı olan mağazalardan 100 manatdan çox alış-veriş edən həm yerli, həm də xarici vətəndaşlar aldıqları məhsulların əlavə dəyər vergisinin (ƏDV) müəyyən qismini nağd və bank hesabına (karta) köçürmə yolu ilə geri ala bilər.
Festivalın rəsmi tərəfdaşları Vergilər Nazirliyi, AZAL, Vətəndaşlara Xidmət və Sosial İnnovasiyalar üzrə Dövlət Agentliyi və AzərTürk Bankdır.
Bakı Ticarət Festivalında “Bravo” hiper-marketi və “Neptun” super-marketi də iştirak edəcək. Bir sıra aptek də festivala qoşulub.
Təşkilatçılar turistlər üçün xüsusi paketlər hazırlayaraq turizm agentliklərinə təqdim edəcək. Bu paketlərə aviabilet, transfer, sığorta, 3 gecə oteldə qalma, festival mağazalarına ticarət turlarının təşkili daxildir.
Turistlər və alıcılar üçün “Park Bulvar Mall”da “Şopomania” oyunu, “28 Mall” və “Gənclik Mall” ticarət mərkəzlərində interaktiv oyunlardan ibarət “Uğurlu çarx” əyləncə proqramı təşkil olunacaq.
Məlumata görə, festival müddətində həyata keçiriləcək poz-qazan formatında hazırlanmış ani stimullaşdırıcı lotereyalar zamanı müştəri digər iştirakçıları gözləmədən qazanmaq şansı əldə edir. Festival iştirakçısı olan istənilən mağazada bir dəfəyə 100 manat və daha çox alış-veriş edən hər bir kəs lotereya iştirakçısı ola bilər. 100-500 manatlıq alış-veriş edənlər 1 bilet, 500 manat və daha çox alış-veriş edənlər isə 2 bilet əldə edə biləcəklər.
