YUNESKO-nun yeni baş direktoru
Fransanın keçmiş mədəniyyət və kommunikasiya naziri Odri Azuley YUNESKO-nun baş direktoru seçilib.
YUNESKO BMT-nin elm, təhsil və mədəniyyət qurumudur.
Novator.az bildirir ki, baş direktor postuna seçkinin ilk turu YUNESKO-nun İcraiyyə Şurasının 58 təmsilçisinin iştirakı ilə oktyabrın 9-u Parisdə keçirilmiş, lakin yeddi namizəddən heç biri mütləq səs çoxluğu qazana bilməmişdi.
YUNESKO-nun baş direktoru vəzifəsinə namizədlər sırasında Azərbaycanın Rusiyadakı səfiri Polad Bülbüloğlu da var idi. O, ilk turdan sonra seçkidən çəkilmişdi.
Odri Azuley baş direktor vəzifəsinə seçkinin sonuncu – beşinci turunda seçilib. Onu İcraiyyə Şurasına üzv olan 58 dövlətdən 30-u dəstəkləyib. Odri Azuleyin Qatardan olan rəqibi isə 28 səs alıb.
Yeni rəhbər YUNESKO-nun gələn ay keçiriləcək 39-cu baş konfransında təsdiqlənəcək.
Təşkilatın tarixində ikinci dəfədir Fransanın nümayəndəsi YUNESKO-da baş direktor seçilir.
Odri Azuley 1972-ci ildə Fransada doğulub. Uşaqlığı Fransa və Mərakeşdə keçib. Orta təhsilini Fransada, ali təhsilini Fransa və Böyük Britaniyada alıb. Fransanın mədəniyyət və kommunikasiya naziri postunda 2016-2017-ci illərdə çalışıb. Ana dilindən başqa ingilis və ispan dillərini də bilir. Ailəlidir, iki övladı var.
