Yeni nazir kollektivə təqdim olunub
Oktyabrın 13-də prezidentin iqtisadi məsələlər üzrə köməkçisi Əli Əsədov yeni təyin olunmuş energetika naziri Pərviz Şahbazovu nazirliyin kollektivinə və yanacaq-energetika sektorunda fəaliyyət göstərən dövlət qurumlarının rəhbərlərinə təqdim edib.
Pərviz Şahbazov energetika naziri vəzifəsinə oktyabrın 12-də prezident İlham Əliyevin sərəncamına əsasən təyin olunub.
Pərviz Oqtay oğlu Şahbazov 1969-cu il noyabrın 24-də Bakı şəhərində anadan olub. İndiki Neft və Sənaye Universitetini bitirib. 1991-ci ildə diplomatik xidmətə qəbul olunub. Xarici İşlər Nazirliyində məsul vəzifələr tutub, Azərbaycanın Avstriyadakı səfirliyində çalışıb. 2005-2016-cı illərdə Azərbaycanın Almaniyada səfiri olub.
Novator.az-ın məlumatına görə, toplantı zamanı nazir Pərviz Şahbazov ölkə başçısının ona göstərdiyi yüksək etimada görə təşəkkürünü bildirib, qarşıya qoyulan vəzifələri layiqincə yerinə yetirəcəyini qeyd edib. O, diplomatik fəaliyyəti dövründə xaricdə Azərbaycanın enerji siyasətinin həyata keçirilməsində yaxından iştirak etdiyini bildirib.
Nazir ölkədə energetika sektorunun qloballaşma dövrünün tələblərinə uyğun inkişafı və bu sahədə beynəlxalq təcrübənin tətbiqinin zəruriliyini vurğulayıb.
Tədbirdə Dövlət Neft Şirkətinin prezidenti Rövnəq Abdullayev, “Azərenerji” ASC-nin prezidenti Etibar Pirverdiyev, “Azərişıq” ASC-nin sədri Baba Rzayev, Dövlət Neft Şirkətinin “Azərikimya” İstehsalat Birliyinin Müşahidə Şurasının sədri Muxtar Babayev və “Azəriqaz” İstehsalat Birliyinin baş direktoru Əkbər Hacıyev iştirak ediblər.
