Kimlər qıraqda qalır?
2018-ci ildə Rusiyada keçiriləcək 21-ci dünya futbol çempionatına hələlik 23 milli komanda vəsiqə qazanıb. Onların 7-si əvvəllər dünya çempionu olmuş komandadır: Braziliya (5 dəfə), Almaniya (4 dəfə), Argentina, Uruqvay (2 dəfə), İngiltərə, Fransa, İspaniya (1 dəfə).
Başqa bir dünya çempionu – İtaliya milli komandasının (4 dəfə) Rusiyaya gedib-getməyəcəyi noyabr ayında bilinəcək.
Novator.az bildirir ki, dünya çempionatı bir çox titullu komandasız baş tutacaq. Avropadan Hollandiya (3 dəfə dünya çempionatında 2-ci yeri, 1 dəfə 3-cü yeri, 1 dəfə 4-cü yeri tutub), Macarıstan (2 dəfə 2-ci yeri tutub), Çexiya (Çexoslovakiya dönəmində 2 dəfə 2-ci yeri tutub), Avstriya (1 dəfə 3-cü, 1 dəfə 4-cü yeri tutub), Türkiyə (1 dəfə 3-cü yeri tutub), Bolqarıstan (1 dəfə 4-cü yeri tutub) seçmə mərhələni dəf edə bilməyiblər.
Rumıniya, Şotlandiya kimi ənənəvi komandalar da ələnib.
Seçmə raundun yekununda Cənubi Amerikadan Çili (1 dəfə 3-cü yeri tutub), Paraqvay, Ekvador, Şimali və Mərkəzi Amerikadan ABŞ (1 dəfə 3-cü yeri tutub) qıraqda qalıblar.
Afrikadan Kamerun, Əlcəzair, Qananın ələndiyi dəqiqləşib.
Avropadan İtaliya ilə yanaşı İsveç (1 dəfə 2-ci, 2 dəfə 3-cü, 1 dəfə 4-cü yeri tutub) və Xorvatiyanın (1 dəfə 3-cü yeri tutub), eləcə də Danimarka, İrlandiya, İsveçrə milli komandalarının, Cənubi Amerikadan Perunun ələnməsi mümkündür…
