22-ci görüşün yeri bilindi
Azərbaycan və Ermənistan prezidentləri İlham Əliyevlə Serj Sərkisyanın 2017-ci ildə ilk görüşü gələn həftə İsveçrənin Cenevrə şəhərində olacaq. Novator.az-ın məlumatına görə, bunu hakim Ermənistan Respublika Partiyası sədrinin müavini, parlamentin xarici əlaqələr komissiyasının başçısı Armen Aşotyan bəyan edib.
Armen Aşotyan deyib ki, görüş məsələsi oktyabrın 12-si Respublika Partiyasının icra orqanının toplantısında qurumun sədri, dövlət başçısı Serj Sərkisyanla müzakirə olunub. Onun sözlərinə görə, görüş razılaşması ATƏT-in Minsk qrupunun Fransa, Rusiya, ABŞ-dan olan həmsədrləri və ATƏT sədrinin xüsusi nümayəndəsinin ötən həftə Yerevanda və Bakıda apardığı danışıqlarda əldə edilib.
1988-ci ildə başlayan Qarabağ müharibəsində Ermənistan Azərbaycanın Dağlıq Qarabağ bölgəsini və Laçın, Kəlbəcər, Qubadlı, Zəngilan, Cəbrayıl, Füzuli, Ağdam rayonlarını, eləcə də Qazax rayonunun 7, Naxçıvan Muxtar Respublikasının 1 kəndini işğal edib. 1994-cü ildə elan olunan atəşkəsdən bəri sülh danışıqları heç bir nəticə vermir.
Hazırda sülh danışıqları Madrid prinsipləri əsasında aparılır. Minsk qrupu həmsədrlərinin 2007-ci ildə Madriddə irəli sürdüyü prinsiplər Dağlıq Qarabağ ətrafında olan rayonların mərhələlərlə Azərbaycanın nəzarətinə qaytarılması şərti ilə bölgənin yekun statusunun müəyyənləşməsini nəzərdə tutur.
1998-ci ildən bəri Azərbaycan və Ermənistan prezidentləri 53 görüş keçiriblər. Bunun 23-ü Heydər Əliyevlə Robert Köçəryanın görüşləri, 9-u İlham Əliyevlə Robert Köçəryanın görüşləri, 21-i İlham Əliyevlə Serj Sərkisyanın görüşləridir.
İlham Əliyevlə Serj Sərkisyan ilk dəfə 2008-ci ilin iyun ayında, sonuncu dəfə 2016-cı ilin iyun ayında bir araya gəliblər:
5 iyun 2008-ci il – Sankt-Peterburq, Rusiya
2 noyabr 2008-ci il – Moskva, Rusiya
28 yanvar 2009-cu il – Sürix, İsveçrə
7 may 2009-cu il – Praqa, Çexiya
4 iyun 2009-cu il – Sankt-Peterburq
17-18 iyul 2009-cu il – Moskva
8-9 oktyabr 2009-cu il – Kişinyov, Moldova
22 noyabr 2009-cu il – Münhen, Almaniya
25 yanvar 2010-cu il – Soçi, Rusiya
17 iyun 2010-cu il – Sankt-Peterburq
27 oktyabr 2010-cu il – Həştərxan, Rusiya
5 mart 2011-ci il – Soçi
24 iyun 2011-ci il – Kazan, Rusiya
25 yanvar 2012-cu il – Soçi
19 noyabr 2013-cü il – Vyana, Avstriya
10 avqust 2014-cü il – Soçi
4 sentyabr 2014-cü il – Nyu-Port, Uels
27 oktyabr 2014-cü il – Paris, Fransa
19 dekabr 2015-ci il – Bern, İsveçrə
16 may 2016-cı il – Vyana
20 iyun 2016-cı il – Sankt-Peterburq.
