Xarici turistlərin sayı 20,9 faiz artıb
Turizm Şurasının sədri, mədəniyyət və turizm naziri Əbülfəs Qarayev bəyan edib ki, bu ilin yanvar-sentyabr aylarında Azərbaycana gələn xarici turistlərin sayı ötən ilin 9 ayı ilə müqayisədə 20,9 faiz artıb.
Nazir Turizm Şurasının 11 oktyabr iclasında 9 ayda Azərbaycana 2 milyon 71 min 918 nəfər xarici turistin səfər etdiyini deyib: “Bu ilin ilk yeddi ayında xarici turistlərin ölkəmizdə bank əməliyyatları ötən illə müqayisədə 97 faiz artaraq 703 milyon manatdan çox olub. Ümumilikdə isə cari ilin 8 ayında xarici turistlər ölkəmizdə elektron kart vasitəsilə 1 milyard 300 milyon manat vəsait xərcləyib. Yerli turistlərin 8 ayda xarici ölkələrdə xərclədiyi məbləğ isə 1 milyard 200 milyon manat olub.
Son bir neçə il ərzində qurulan turizm infrastrukturunun nəticəsində bu sahədə 46 min nəfər çalışır. Bura mədəniyyət sahəsində çalışan 60 min nəfərdən çox şəxsi də əlavə etsək, ümumilikdə 100 min nəfərdən çox insan turizm sahəsinə xidmət edir”.
Nazir regionlarda da turizmin inkişaf etdiyini diqqətə çatdırıb: “Yay mövsümündə regionlardakı hotellərdə və mehmanxana tipli obyektlərdə 860 mindən çox yerləşdirmə olub. Bu ilin 8 ayında isə bu göstərici 1 milyon 294 min nəfərdən artıqdır”.
