Ukraynasız toplantı, qapalı çıxışlar, 18 sənəd
Prezident İlham Əliyevin Rusiyaya işgüzar səfəri başa çatıb. Oktyabrın 11-də o, Soçidə MDB Dövlət Başçıları Şurasının və Ali Avrasiya İqtisadi Şurasının iclaslarında iştirak edən rəsmilərin birgə naharından sonra Bakıya qayıdıb.
Həmin gün MDB Dövlət Başçıları Şurasının məhdud tərkibdə iclasına qatılan İlham Əliyev iclasda çıxış edib. İclas qapalı keçirildiyi üçün dövlət başçısının, eləcə də digər rəsmilərin nədən danışdığı bilinmir.
1991-ci ildə yaradılmış MDB-yə Rusiya, Belarus, Ukrayna, Moldova, Azərbaycan, Ermənistan, Qazaxıstan, Özbəkistan, Türkmənistan, Qırğızıstan, Tacikistan daxildir. Novator.az qeyd edir ki, 11 oktyabr sammitində Rusiyanı, Azərbaycanı, Qazaxıstanı, Ermənistanı, Belarusu, Tacikistanı, Özbəkistanı, Moldovanı, Türkmənistanı prezidentlər, Qırğızıstanı baş nazir təmsil edib. Ukrayna sammitə qatılmayıb.
AZƏRTAC-ın məlumatına görə, qapalı iclasın ardınca keçirilən geniş tərkibli toplantıda gələn il yanvarın 1-dən MDB-də sədrliyin Rusiyadan Tacikistana keçəcəyi bəyan olunub. Tacikistan prezidenti İmaməli Rəhman çıxışında qeyd edib ki, əldə olunmuş nəticələrin möhkəmləndirilməsi ölkəsinin MDB-yə sədrliyi dövründə prioritet məsələ kimi qalacaq. O, iqtisadi, energetika, alternativ enerji, yüklərin tranziti, logistika, kənd təsərrüfatı, ərzaq təhlükəsizliyinin təmini məsələlərinə diqqət yetiriləcəyini vurğulayıb, humanitar, turizm, innovasiya, ətraf mühitin mühafizəsi, terrorizmin və mütəşəkkil cinayətkarlığın qarşısının alınması istiqamətində əlaqələrin genişləndiriləcəyini deyib.
İclasda qurumun fəaliyyəti ilə bağlı 18 sənəd imzalanıb.
