Poroşenko Krımı satmaq təklifinə cavab verdi
Ukrayna prezidenti Pyotr Poroşenko oktyabrın 11-i Strasburqda, Avropa Şurası Parlament Assambleyasının (AŞPA) sessiyasında çıxış edib. Novator.az-ın məlumatına görə, dövlət başçısı Ukrayna ərazilərinin işğalı məsələsinə də toxunub. O, Rusiyanın beynəlxalq hüququ pozduğunu və bu bəd əməlindən geri durmaq istəmədiyini deyib.
Pyotr Poroşenko ad çəkmədən Çexiya prezidenti Miloş Zemana sərt cavab verib. O deyib ki, Krım məsələsindən bitmiş məsələ kimi danışmağı qəti şəkildə qəbul etmir.
Dövlət başçısı AŞPA tribunasının ərazilərin alğı-satqısı tribunası olmadığını vurğulayıb: “Bu tribuna bizim dəyərlərin, prinsiplərin müdafiəsi üçün qurulub. İndi həmin dəyərlərin müdafiəsinə ciddi ehtiyac var”.
Prezident AŞPA-nı işğal olunmuş torpaqların azad edilməsi və insan haqlarının qorunması işində səyləri artırmağa çağırıb. O, Ukraynanın işğal olunmuş Krım və Donbas bölgələrində insan hüquqlarının qorunmasına diqqət göstərməyə səsləyib.
Novator.az xatırladır ki, Çexiya prezidenti Miloş Zeman AŞPA-nın 10 oktyabr iclasında Krımın işğalı məsələsinə toxunub. Dövlət başçısı Rusiyanın Krımı ilhaq etməsinin qanunsuz olduğunu vurğulayıb, ancaq bununla barışmağa çağırıb: “Krım ilhaq olunub, bu şübhə doğurmur. Ancaq bu məsələ bitmiş məsələdir”.
Miloş Zeman Krım məsələsinin həllini Rusiyanın Ukraynaya təzminat ödəməsində gördüyünü deyib. O qeyd edib ki, Ukraynanın təzminata razılaşmaması, Krımı qaytarmağa cəhd göstərməsi Avropada müharibəyə gətirə bilər: “Biz bu müharibəyə yol verməməliyik”.
Rusiya Ukraynanın Krım yarımadasını 2014-cü ildə işğal edərək özünə birləşdirib. Moskva Donbas bölgəsinin bir hissəsini zəbt etmiş separatçı rejimləri də dəstəkləyir.
