Millətlər Liqası divizionlarının yekun tərkibi
Oktyabrın 11-də Millətlər Liqası divizionlarının yekun tərkibi açıqlanıb. Tərkib UEFA-nın milli komandalar üçün reytinqinə əsaslanır:
A divizionu – Almaniya, Portuqaliya, Belçika, İspaniya, Fransa, İngiltərə, İsveçrə, İtaliya, Polşa, İslandiya, Xorvatiya, Hollandiya;
B divizionu – Avstriya, Uels, Rusiya, Slovakiya, İsveç, Ukrayna, İrlandiya, Bosniya, Şimali İrlandiya, Danimarka, Çexiya, Türkiyə;
C divizionu – Macarıstan, Rumıniya, Şotlandiya, Sloveniya, Yunanıstan, Serbiya, Albaniya, Norveç, Monteneqro, İsrail, Bolqarıstan, Finlandiya, Kipr, Estoniya, Litva;
D divizionu – Azərbaycan, Makedoniya, Belarus, Gürcüstan, Ermənistan, Latviya, Farer adaları, Lüksemburq, Qazaxıstan, Moldova, Lixtenşteyn, Malta, Andorra, Kosovo, San Marino, Cəbəllütariq.
Novator.az bildirir ki, 2018-ci ilin sentyabrından start götürəcək Millətlər Liqasının reqlamentinə görə, A və B divizionları üç komandalıq dörd qrupdan ibarət olur. C divizionunda üç komandalıq bir, dörd komandalıq üç qrup, D divizionunda dörd komandalıq dörd qrup formalaşır.
İki dövrədən ibarət qrup turniri 2018-ci ilin noyabr ayında bitir.
A divizionundakı dörd qrup qalibi 2019-cu ilin iyununda keçiriləcək final mərhələsinə vəsiqə qazanır. Bu raund yarımfinallar, üçüncü yer uğrunda oyun və finaldan ibarətdir.
B, C və D divizionlarının qrup qalibləri yuxarı diviziona çıxır, A, B və C divizionlarının qruplarında sonuncu olanlar aşağı diviziona düşür.
Millətlər Liqası 2020-ci ilin Avropa futbol çempionatının final mərhələsinə hər diviziondan bir komanda olmaqla dörd vəsiqə verir. Bunun üçün divizionlardakı qrup qalibləri arasında yarımfinal və final matçları keçirilir.
Qrup qalibi Avropa çempionatına həmin turnirin özünün seçmə mərhələsindən düşəndə onu Millətlər Liqasının növbəti ən yaxşı komandası əvəzləyir.
Millətlər Liqasının qrup mərhələsinin püşkü 2018-ci il yanvarın 24-də atılacaq.
