Belarus səfərindən yeni bilgilər
Mod.gov.az müdafiə naziri Zakir Həsənovun Belarus səfəri ilə bağlı yeni bilgilər yayıb. Rəsmi məlumata görə, oktyabrın 10-da Zakir Həsənovun rəhbərlik etdiyi nümayəndə heyəti Belarus Hərbi Akademiyasında olub. Nazirə akademiyanın strukturu, fəaliyyəti və əsas tapşırıqları barədə brifinq təqdim edilib.
Hərbi təhsil müəssisəsinin əməliyyat-taktiki və strateji səviyyəli müxtəlif fakültələri ilə tanış olan nümayəndə heyətinə silah, hərbi texnika və digər döyüş vasitələri nümayiş etdirilib, onların təyinatı və tətbiqi imkanları barədə məlumat verilib.
Həmin gün Zakir Həsənov Minskdə Təhlükəsizlik Şurasının dövlət katibi Stanislav Zasla görüşüb. Tərəflər iki ölkə arasında müxtəlif istiqamətlərdə, xüsusilə hərbi, hərbi-texniki sahədə əməkdaşlığı müzakirə edib, sıx qarşılıqlı əlaqələrin genişləndirilməsinin və əməkdaşlığın daha da inkişaf etdirilməsinin vacibliyini vurğulayıblar.
Müdafiə Nazirliyinin nümayəndə heyəti Belarus hərbi-sənaye kompleksinin elmi-istehsalat müəssisəsinə də baş çəkib. Zakir Həsənova müəssisədə hazırlanan və istehsal edilən hava hücumundan müdafiə vasitələri, eləcə də qoşunların idarə olunmasında ixtisaslaşan müxtəlif təyinatlı digər vasitələr təqdim edilib.
