9 vəsiqə qaldı
Dünya futbol çempionatının final raunduna adlayan milli komandaların sayı 23-ə çatıb. Novator.az-ın məlumatına görə, seçmə mərhələnin 10 oktyabr oyunlarında Avropadan Fransa, Portuqaliya, Cənubi Amerikadan Uruqvay, Kolumbiya, Argentina, Şimali və Mərkəzi Amerikadan Panama Rusiyaya bilet əldə edib.
2018-ci ildə keçiriləcək çempionata ev sahibi Rusiya ilə yanaşı Avropadan Almaniya, İngiltərə, Belçika, İspaniya, Polşa, Serbiya, İslandiya, Afrikadan Nigeriya, Misir, Şimali və Mərkəzi Amerikadan Meksika, Kosta Rika, Cənubi Amerikadan Braziliya, Asiyadan Cənubi Koreya, Yaponiya, Səudiyyə Ərəbistanı, İran daha əvvəl vəsiqə alıb.
İndi 9 vəsiqə vakant qalır. 3 vəsiqənin sahibi gələn ay Afrikada qrup turniri bitəndə bilinəcək.
Noyabrda həmçinin Asiya təmsilçisi Avstraliya Şimali və Mərkəzi Amerikadan Hondurasla, Cənubi Amerikadan Peru Okeaniya zonasının təmsilçisi Yeni Zelandiya ilə oyunlar keçirir.
Avropanın seçmə qruplarında ikinci yeri tutmuş Şimali İrlandiya, Danimarka, İtaliya, İrlandiya, Xorvatiya, Yunanıstan, İsveç, İsveçrə milli komandaları isə 4 vəsiqə uğrunda mübarizə üçün cütlüklərə bölünəcək. Bu raund da noyabr ayına təyin olunub.
