Moskvaya zəng
Oktyabrın 7-də prezident İlham Əliyev rusiyalı həmkarı Vladimir Putinə zəng vurub. Dövlət başçısı Vladimir Putini ad günü münasibətilə təbrik edib, ona fəaliyyətində uğurlar, cansağlığı arzulayıb.
Telefon söhbətində dövlət başçıları Azərbaycanla Rusiya arasında strateji tərəfdaşlıq prinsiplərinə əsaslanan dostluq münasibətlərinin bundan sonra da bütün sahələrdə uğurla inkişaf edəcəyinə əminliklərini ifadə edib, əməkdaşlığın perspektivləri ətrafında fikir mübadiləsi aparıblar.
Xəbəri Azərbaycan prezidentin mətbuat xidməti yayıb.
Vladimir Putin oktyabrın 7-də 65 yaşını qeyd edir. O, 1999-cu ilin avqustunda baş nazir təyin olunub, dekabrın 31-dən həmçinin prezident vəzifəsini icra edib, 2000 və 2004-cü illərdə prezident seçilib.
2008-ci ildə baş nazir kürsüsünə qayıdan Vladimir Putin 2012-ci ildən yenidən prezident postunu tutur.
