Milli Şuranın etiraz aksiyası
Demokratik Qüvvələrin Milli Şurası oktyabrın 7-si Bakıda mitinq keçirib. Saat 15-dən 17-dək Yasamal rayonundakı İdman-Sağlamlıq Kompleksinin stadionunda keçirilən aksiyada korrupsiyaya, insan hüquqlarının tapdanmasına son qoyulması, siyasi məhbusların azadlığa buraxılması tələb olunub.
Azadliq.org-un məlumatına görə, aksiyada çıxış edən Milli Şuranın Koordinasiya Mərkəzinin üzvü, AXCP sədri Əli Kərimli hökumətin gənclərdən qorxduğunu vurğulayıb. O, 23 sentyabr mitinqi ərəfəsində tutulan, inzibati həbs alan cəbhəçilərdən danışıb: “Bizim mitinqin aparıcısı İlham Hüseyni, əvvəlki mitinqdə çıxış etməli olan Emil Səlimovu, bu gün çıxış etməli olan başqa bir gənci həbs ediblər. Bundan əvvəl də onlarla parlaq azərbaycanlı gənci həbsə salıblar. Biz bütün Azərbaycan gəncliyinə azadlıq istəyirik”.
Əli Kərimli qeyd edib ki, etiraza qalxanların qarşısını heç nə ilə almaq mümkün deyil: “El gücü sel gücüdür. Bizim təşkilatçılar da qorxmazdır, onları qorxutmaq olmaz. Biz xalqın təpəri ilə bu ölkədə haqsız yerə həbs edilmiş hər bir kəsin azadlığına nail olacağıq”.
AXCP sədri deyib ki, etiraza qalxan insanların əsas tələbi xalqın milyonlarını oğurlayıb ofşor hesablara köçürənlərə dur deməkdir: “Körpə, əlil, qazi, ahıl malı yeyənlər, kimsəsizin son tikəsini ağzından oğurlayanlar bunun cəzasını çəkəcəklər. Hökumətin bugünkü siyasəti təhlükəlidir. Təkcə bizdən ötrü yox, bir çox başqa ölkə üçün də. Onlar hesab edirlər ki, buradan dünyaya korrupsiya virusu yayılır. Azərbaycan üçün bu təhlükə ikiqatdır”.
