Vədin icrası başladı
Oktyabrın 5-də sərəncam imzalayan prezident İlham Əliyev Şamaxının Dəmirçi kəndini İsmayıllının Lahıc qəsəbəsi ilə birləşdirən 22 kilometrlik avtomobil yolunun tikintisi üçün bu ilin dövlət büdcəsindən “Azəravtoyol” Açıq Səhmdar Cəmiyyətinə ilkin olaraq 3 milyon manat ayrılmasını tapşırıb.
Sərəncama əsasən, 2018-ci ilin dövlət büdcəsi layihəsində avtomobil yolunun tikintisinin başa çatdırılması üçün zəruri olan maliyyə vəsaiti nəzərdə tutulmalıdır.
Novator.az xatırladır ki, oktyabrın 2-də Şamaxı səfərinə çıxan prezident Dəmirçi kəndində olarkən oradan Lahıca qədər yol çəkiləcəyini vəd edib: “Mən tapşırıq vermişəm, bu il işlər başlayacaq və yol gələn il istifadəyə veriləcək”.
Hazırda Dəmirçidən Lahıca getmək üçün 70-80 kilometr yol qət etmək lazım gəlir.
Oktyabrın 5-də İlham Əliyev Lahıc kəndi ilə bağlı sərəncamlar da verib. Sərəncamın birinə əsasən, Dövlət Neft Şirkəti Lahıc qəsəbəsinin qazlaşdırılmasını təmin etməlidir. Digər sərəncam qəsəbədə 400 şagird yerlik yeni ümumtəhsil məktəbi binasının tikintisi üçün 2017-ci il dövlət büdcəsindən Təhsil Nazirliyinə 3,5 milyon manat ayrılmasını nəzərdə tutur.
