Nobel sülh mükafatının qalibi bəlli oldu
Oktyabrın 6-da 2017-ci ilin Nobel sülh mükafatının laureatı açıqlanıb. Novator.az-ın məlumatına görə, mükafat Nüvə Silahının Qadağan Olunması üzrə Beynəlxalq Kampaniyaya verilib.
Norveç Nobel Komitəsi bəyan edib ki, təşkilat nüvə silahından istifadənin doğurduğu və doğura biləcəyi humanitar fəlakətlərə diqqət yönəldilməsi sahəsindəki xidmətlərinə görə mükafatlandırılıb.
Nüvə Silahının Qadağan Olunması üzrə Beynəlxalq Kampaniya bu il iyulun 7-də nüvə silahının qadağan edilməsi barədə sazişin imzalanmasına nail olub. Sazişə 53 ölkə qoşulub. Nüvə silahına malik ölkələrdən heç biri sazişi imzalamasa da, ABŞ, Rusiya, Böyük Britaniya, Fransa və Çin tədricən nüvə silahı ehtiyatını azaltmağa razılaşıblar.
Bu il Nobel sülh mükafatına 318 namizəd (215 şəxs, 103 təşkilat) vardı.
