Gömrükdə 7 manat 28 qəpik, satışda 18 manat
Oktyabrın 4-də Dövlət Gömrük Komitəsi ölkəyə idxal olunan kərə yağının qiymətindəki artımın gömrük orqanlarının fəaliyyəti ilə bağlayan məlumatları təkzib edib. Həmin açıqlamada qeyd olunub ki, kərə yağının qiymətində artımın baş verdiyi dövrdə bu mal növü üzrə gömrük vergi və rüsumlarında hər hansı dəyişiklik olmayıb: “Ötən il 1 kiloqram yağ 3,39 ABŞ dollarına, cari ildə isə 4,28 ABŞ dollarına rəsmiləşdirilib. Artım dünya bazarında yağ məhsulunun bahalaşması ilə əlaqədardır”.
Novator.az-ın məlumatına görə, oktyabrın 6-da komitə yenidən bu məsələyə qayıdaraq bəyan edib ki, 1 kiloqram kərə yağının cari ilin sentyabr ayı üçün orta statistik qiyməti 5,20 ABŞ dollarıdır: “İdxal əməliyyatları zamanı gömrük dəyəri gömrük orqanlarına təqdim edilən xarici ticarət müqavilələrində müəyyən olunan satış qiymətləri, göndərmə şərtləri əsasında formalaşır və müvafiq gömrük ödənişləri hesablanır. Gömrük ödənişləri ödənildikdən sonra məhsul sərbəst dövriyyəyə buraxılır”.
Hazırda kərə yağının 1 kiloqramı 16-18 manata satılır. Dövlət Gömrük Komitəsinin 4 oktyabr məlumatına əsasən, bu il 1 kiloqram yağ 4,28 ABŞ dollarına rəsmiləşdirilib. Bu, 7 manat 28 qəpik eləyir.
6 oktyabr məlumatında Dövlət Gömrük Komitəsi cari ilin sentyabr ayı üçün kərə yağının orta statistik qiymətinin 5,20 ABŞ dolları olduğunu bildirir. Bu, 8 manat 84 qəpiyə bərabərdir.
