Dünya çempionatına yeni vəsiqələr
Dünya futbol çempionatının final raunduna keçmək şansını ötən ay itirən Azərbaycan milli komandası seçmə mərhələdə son ev oyununu keçirib. Avropanın C qrupunda yarışan milli komanda oktyabrın 5-i Bakı Olimpiya Stadionunda Çexiyaya 1:2 hesabı ilə məğlub olaraq beşinci sıraya yuvarlanıb.
Səfərdə Şimali İrlandiyanı 3:1 hesabı ilə yenən Almaniya C qrupunda ilk pilləni təmin edərək final mərhələsinə adlayıb.
Novator.az-ın məlumatına görə, oktyabrın 5-i F qrupunda da birincinin kimliyinə aydınlıq gəlib. İngiltərə sona 1 tur qalmış zirvəni fəth edərək dünya çempionatının final mərhələsində oynamaq hüququ qazanıb.
Avropada mübarizə 9 qrupda gedir. Qaliblər final mərhələsinə birbaşa çıxır, ikinci yeri tutan komandalardan 8-i isə bunun üçün əlavə oyunlar keçirməlidir. Dünənədək H qrupunda qalib bəlli idi: Belçikanın finala çıxması sentyabr ayında rəsmiləşib.
2018-ci ildə Rusiyada keçiriləcək çempionata Cənubi Amerikadan Braziliya, Şimali və Mərkəzi Amerikadan Meksika, Asiyadan Cənubi Koreya, Yaponiya, Səudiyyə Ərəbistanı, İran da vəsiqə alıb.
