“Turan”ın pulu borca gedəcək
Vergilər Nazirliyi oktyabrın 2-də “Turan” informasiya agentliyinin hesabları olan banklara hesaba girən pulun vergi borcunun ödənilməsi üçün müsadirəsinə göstəriş verib. Qərar agentlik oktyabrın 1-dən işini bərpa edəndən sonra banklara göndərilib.
Novator.az bildirir ki, “Turan”a 36 min 547 manat vergi borcu hesablanıb. Bunun 27 min 253 manatı əsas borc, 9 min 294 manatı hesablanmış faizlərdir.
Avqustda Vergi Cinayətlərinin İbtidai Araşdırılması Departamenti agentliyə cinayət işi qaldırıb. Həmin ayın 24-də agentliyin direktoru Mehman Əliyev bu cinayət işi zəminində tutulub, bir gün sonra Yasamal Rayon Məhkəməsi onu 3 aylıq həbs edib. Sentyabrın 11-də Mehman Əliyev başqa yerə getməmək şərti ilə həbsdən buraxılıb.
Jurnalist qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunur. İstintaq iddia edir ki, Mehman Əliyev 2010-2014-cü illərdə dövlət qeydiyyatına alınmamış qrant müqavilələri üzrə 148310 manat məbləğində qanunsuz gəlir əldə edib, 2010-2016-cı illərdə 60080 manat məbləğində mənfəət vergisini dövlət büdcəsinə ödəməkdən yayınıb.
Vergi ödəməkdən yayınma üzrə cinayət işi çərçivəsində “Turan”ın hesabları bir müddət bağlı qalıb, agentliyin fəaliyyəti dayanıb.
“Turan”ın 4 oktyabr məlumatında qeyd olunur ki, agentliyin maliyyə-təsərrüfat fəaliyyəti iflic vəziyyətindədir, əməkdaşlar sentyabrın 5-dən ödənişsiz məzuniyyətə göndəriliblər və könüllü əsaslarla işi qismən davam etdirirlər.
