Sahibkarlara 5,6 milyon manat güzəştli kredit verilib
İqtisadiyyat Nazirliyinin Sahibkarlığa Kömək Milli Fondu oktyabrın 5-də Xırdalan şəhərində işgüzar forum keçirib.
Rəsmi bilgiyə görə, forumda Abşeron iqtisadi rayonunda fəaliyyət göstərən sahibkarlara 5,6 milyon manat güzəştli kredit verilib və bununla 160-dan çox yeni iş yerinin açılmasına imkan yaranacağı qeyd olunub. Kreditlərin heyvandarlıq, quşçuluq, müasir istixana kompleksinin yaradılması, tara, tikinti materialları, yapışqan lent istehsalı sahələrinin inkişafına yönəldiləcəyi bildirilir.
Məlumat verilib ki, bu il 1270 sahibkarlıq subyektinin investisiya layihəsinin maliyyələşdirilməsinə 96,5 milyon manat güzəştli kredit ayrılıb.
