Ermənistan parlamenti Rusiya ilə birgə qoşun qrupu sazişini təsdiqlədi
Oktyabrın 5-də Ermənistan parlamenti Rusiya ilə birgə qoşun qrupu haqqında sazişi təsdiqləyib. Novator.az-ın məlumatına görə, 87 deputat sazişin rəsmiləşməsinə səs verib, müxalif “Çıxış” blokundan 7 deputat sənədin əleyhinə çıxıb.
Saziş sonradan artırılmaq şərti ilə 5 il qüvvədə olacaq.
İki ölkənin birləşmiş qoşun qrupunu yaratmaq barədə sazişi ötən il noyabrın 30-da Rusiya və Ermənistanın müdafiə nazirləri imzalayıb. Sazişə əsasən, birgə qrupa Ermənistandakı 102-ci Rusiya hərbi bazası və Ermənistan Silahlı Qüvvələrinin hərbi hissəsi daxil olur.
Ermənistan-Rusiya birləşmiş qoşun qrupunun komandanı ermənidir: general-mayor Andranik Makaryan.
Birgə qoşun qrupu Ermənistana və Rusiyaya təcavüzün qarşısını almağa, iki ölkənin ərazi bütövlüyünün və əhalisinin müdafiəsinə yönəlib.
Sazişə əsasən, Ermənistanla Rusiya hərbi-siyasi vəziyyəti birgə analiz etməyə, ordu qrupunun heyətini və rəhbərliyini müəyyənləşdirməyə, birgə komandanlıq yaratmağa, vahid idarəçilik sistemi qurmağa, qoşunların, kəşfiyyatın, silahlanmanın, maddi-texniki bazanın idarəçiliyini təmin etməyə və operativ-taktiki tapşırıqların birgə yerinə yetirilməsinə öhdəlik götürüblər.
Rusiya Dövlət Duması sazişi bu il iyulun 4-də ratifikasiya edib.
