Navalnıya yeni cəza
Rusiya paytaxtı Moskvanın Simonov Rayon Məhkəməsi müxalif lider Aleksey Navalnıya 20 sutka inzibati həbs cəzası kəsib. Novator.az-ın məlumatına görə, Navalnı icazəsiz kütləvi aksiyaya çağırışda təqsirli bilinib. Qərar oktyabrın 2-də çıxarılıb.
Tərəqqi Partiyasının sədri, Korrupsiya ilə Mübarizə Fondunun təsisçisi olan Navalnını polis əməkdaşları sentyabrın 29-u səhər Moskvadakı evinin çıxışında tutub. Onun Nijni Novqorod şəhərində həmin günə planlaşdırılan icazəsiz mitinqə çağırışla bağlı saxlandığı açıqlanıb, barəsində inzibati protokol tərtib edilib.
41 yaşlı Navalnı bu il iyunun 12-dən iyulun 7-dək Moskvada sanksiyalaşdırılmayan kütləvi aksiyaya çağırış və hüquq mühafizə orqanlarına tabeçilik göstərməmək ittihamı ilə inzibati həbsdə yatıb.
