Yunanıstan mediası yenə tətilə çıxdı
Oktyabrın 3-də Yunanıstan mediası həmkarlar təşkilatlarının qərarı ilə 24 saatlıq növbəti tətilə çıxıb. Novator.az-ın məlumatına görə, tətil əlavə sosial sığorta sisteminin saxlanması, KİV əməkdaşlarının əmək və sosial hüquqlarını qorumaq tələbi ilə keçirilir.
Səhər saat 6-dan radio və televiziyada xəbərlər efirə çıxmır, saytların çoxu işləmir. Tətilin oktyabrın 4-ü səhər saat 6-ya qədər davam edəcəyi bildirilir.
KİV-in bundan əvvəlki 24 saatlıq tətili sentyabrın 26-da keçirilib.
Həmkarlar qurumları Əlavə Sığorta üzrə Vahid Jurnalist Təşkilatı adlı xüsusi fondun saxlanmasını tələb edirlər. Fondun köməyi ilə ehtiyacı olan jurnalistlər əlavə pensiya, birdəfəlik maliyyə yardımı ala, tibbi xidmətdən yararlana bilir.
Son illər maliyyə böhranı üzündən fond vəsait qıtlığı yaşayır.
Səidə Hüseynova
