Terrorçunun 42 silahı varmış
Son bilgilərə görə, ABŞ-ın Las-Veqas şəhərində oktyabrın 1-i gecə törədilmiş terror aktında ölənlərin sayı 59 nəfərə çatıb. 527 nəfər yaralının olduğu xəbər verilir.
Novator.az xatırladır ki, 64 yaşlı amerikalı Stiven Peddok “Mandalay Bay” hotelinin 32-ci mərtəbəsindən musiqi festivalına toplaşanlara aramsız atəş açıb. Açıq havada keçirilən konsertə on minlərlə şəxs qatılıbmış.
Stiven Peddokun intihar etdiyi bildirilir.
Onun hoteldəki otağından 23 odlu silah tapılıb. Daha 19 silahın terrorçunun Meskit şəhərindəki (Nevada ştatı) evindən çıxdığı açıqlanıb.
1 oktyabr terrorunun məsuliyyətini İŞİD öz üzərinə götürüb. Federal Təhqiqatlar Bürosu bu versiyanı araşdırır.
Azərbaycan prezidenti İlham Əliyev amerikalı həmkarı Donald Trampa başsağlığı teleqramı göndərib. Teleqramda deyilir: “Hörmətli cənab prezident, Las-Veqas şəhərində keçirilən musiqi festivalı zamanı insanların qəddarcasına atəşə tutulması nəticəsində çoxsaylı tələfat və yaralananlar barədə xəbər məni son dərəcə sarsıtdı.
Bu dəhşətli hadisə ilə əlaqədar Sizə, həlak olanların ailələrinə və yaxınlarına, bütün Amerika xalqına öz adımdan və Azərbaycan xalqı adından dərin hüznlə başsağlığı verir, yaralananlara şəfa diləyirəm”.
