Prezident kənddə yeni vəd verdi
Oktyabrın 2-də Şamaxı rayonunun Dəmirçi kəndində görülən işlərlə tanış olan prezident İlham Əliyev yeni vəd verib.
AZƏRTAC bildirir ki, Dəmirçi Şamaxının ən qədim kəndlərindən biridir, tarixi XV əsrə gedib çıxır. Qədimdə adı Güneyçay olan kənddə dəmirçilik sənəti geniş yayıldığından sonralar buraya Dəmirçi adı verilib. Bir vaxtlar qədim İpək yolunun kənarında yerləşən kənddə bir neçə karvansara da olub. Lakin karvansara da daxil olmaqla Dəmirçidəki qədim tikililərin çoxu sovet hakimiyyəti illərində dağıdılıb.
Son illər kəndin bərpası və tarixi simasının qorunması ilə bağlı işlər görülür. İlk növbədə kənddəki məscid bərpa olunub. Ölkənin ən qədim dini ocaqlarından olan Dəmirçi məscidi 755-ci ildə tikilib.
Məscidin axundu Nəbi İsgəndərovla söhbətində prezident deyib: “Şamaxı rayonunda tarixi-dini abidələr çoxdur, onlardan biri də bu məsciddir. Bizim borcumuz idi ki, bu qədim tarixi-dini abidəni bərpa edək, qapılarını dindarların üzünə açaq. Çox şadam ki, biz buna nail ola bilmişik. Bərpa zamanı qədim daşlardan istifadə olunub, yəni məscidin tarixi görkəmi tam qorunub. Bu təkcə sizin kənd üçün, Şamaxı üçün yox, bütün Azərbaycan, bütün müsəlman aləmi üçün çox əlamətdar hadisədir”.
İlham Əliyev Dəmirçi kəndinə yol çəkildiyini xatırladaraq deyib: “Buradan da Lahıca qədər yol çəkiləcək. Sizin Lahıcda da qohumlarınız yaşayır, indi onlara tez-tez baş çəkərsiniz”.
Axundun “Lahıca getmək üçün 70-80 kilometr yol qət edirdik. İndi 20 kilometr gedəcəyik. Bu, Sizin sayənizdə olacaq” qeydindən sonra prezident bunları əlavə edib: “Mən tapşırıq vermişəm, bu il işlər başlayacaq və yol gələn il istifadəyə veriləcək. Beləliklə, Dəmirçi kəndinə maraq böyük olacaq, turistlər gələcək. Necə ki, il ərzində Lahıca minlərlə turist gəlir, buraya da gələcək. Bu həm yeni iş yerləri, həm də dolanışığın yaxşılaşması deməkdir. Dəmirçi kəndi ölkəmizin ən gözəl turizm mərkəzlərindən birinə çevriləcək. Dünya da biləcək ki, Azərbaycanda, Şamaxıda belə bir kənd və onun qədim məscidi var, burada gözəl insanlar yaşayırlar. Bax Azərbaycanın gözəlliyi və qüdrəti bundan ibarətdir”.
