Mirqədirova bəraət verilmədi
Oktyabrın 3-də Ali Məhkəmə jurnalist Rauf Mirqədirov barəsindəki hökmdən verilən şikayət üzrə qərar çıxarıb. Vəkil Fuad Ağayev APA-ya deyib ki, şikayət təmin edilməyib. Şikayət ərizəsində jurnalistə bəraət verilməsi istəyi yer almışdı.
Novator.az bildirir ki, 1961-ci il təvəllüdlü Rauf Mirqədirov uzun illər “Zerkalo” qəzetinin siyasi icmalçısı olub, 2010-cu ildən qəzetin Türkiyədə xüsusi müxbiri postunda çalışıb.
2014-cü il aprelin 19-da tutulan jurnalist dövlətə xəyanətdə təqsirli bilinib. İttihama görə, jurnalist Sülh və Demokratiya İnstitutunun xətti ilə Ermənistan xüsusi xidmət orqanlarına casusluq edib. 2015-ci il dekabrın 28-də Bakı Ağır Cinayətlər Məhkəməsi Rauf Mirqədirovu 6 il müddətinə azadlıqdan məhrum edib.
Ötən il martın 17-də Bakı Apellyasiya Məhkəməsi jurnalistin cəzasını 5 il sınaq müddəti tətbiq olunmaqla şərti həbslə əvəzləyib və Rauf Mirqədirov məhkəmə zalından azadlığa buraxılıb.
2014-cü ilin dekabr ayında İsveçrədə Rauf Mirqədirovun həyat yoldaşına və iki qızına siyasi sığınacaq verilib. Ötən il sentyabrın 16-da Avropaya gedən Rauf Mirqədirov da İsveçrəyə sığınıb.
