Prezident Şamaxıya baş çəkib
Oktyabrın 2-də prezident İlham Əliyev Qobustan rayonunun əsaslı təmir edilən Təklə-Sündü-Xilmilli avtomobil yolunun açılışında iştirak edib.
Avtomobil yolu 15 min nəfərin yaşadığı 6 kəndi birləşdirir. Ümumi uzunluğu 17,2 kilometr olan yolun eni 6 metrdir. Dördüncü dərəcəyə aid Təklə-Sündü-Xilmilli avtomobil yolu 2 hərəkət zolaqlıdır. Layihə çərçivəsində müxtəlif diametrli 23 suötürücü boru tikilib, 9 avtobus dayanacağı quraşdırılıb.
Sonra İlham Əliyev Şamaxı rayonuna səfərə gedib. AZƏRTAC-ın məlumatına görə, dövlət başçısı Şamaxı-Çöl Göylər-Padar avtomobil yolunun açılışına qatılıb. “Azəravtoyol” Açıq Səhmdar Cəmiyyətinin sədri Saleh Məmmədov bildirib ki, Bakı-Ələt-Qazax-Gürcüstan ilə dövlət sərhədi və Bakı-Şamaxı-Yevlax avtomobil yolları arasında yeni bir bağlantı yaratmaq məqsədilə 2011-ci ildə 35,8 min nəfər əhalinin yaşadığı 18 yaşayış məntəqəsini birləşdirən Şamaxı-Çöl Göylər-Padar avtomobil yolunun tikintisinə başlanıb. Yolun uzunluğu 53 kilometrdir. Görülən işlər nəticəsində Qazax-Kosalar avtomobil yolu 2 hərəkət zolaqlı olmaqla 3-cü texniki dərəcəyə uyğun yenidən qurulub. Yolun hərəkət hissəsinin eni 7 metrdir.
Hesabata görə, bu avtomobil yolunun tikintisi Aran iqtisadi rayonu ilə Dağlıq Şirvan iqtisadi rayonu arasında 53 kilometr uzunluğunda yeni avtomobil yolu əlaqəsi yaradacaq. Bu da indi istifadə edilən hərəkət marşrutları ilə müqayisədə orta hesabla 120-180 kilometr az məsafə qət etməyə, yanacağa və vaxta qənaət etməyə imkan verəcək.
İlham Əliyev Şamaxıda “Az-Qranata” MMC-yə məxsus üzüm bağları ilə də tanış olub.
