Müxalifət liderinin işi məhkəməyə gedir
Polis sentyabrın 29-u Rusiya paytaxtı Moskvada tutulan müxalif lider Aleksey Navalnı barəsində inzibati protokol tərtib edib. Novator.az-ın məlumatına görə, protokol kütləvi aksiya təşkili qaydalarının pozulması ilə bağlıdır.
Navalnını polis əməkdaşları bu gün səhər Moskvadakı evinin çıxışında tutub. Onun Nijni Novqorod şəhərində sentyabrın 29-na planlaşdırılan icazəsiz mitinqə çağırışla bağlı saxlandığı açıqlanıb. Müxalif lider icazəsiz kütləvi tədbirlərə təkrar çağırışlarda təqsirli bilinir.
Navalnı haqda materiallar məhkəməyə göndəriləcək. İttiham müxtəlif inzibati cəzalar nəzərdə tutur: 300 min rubl cərimə; 200 saat məcburi iş; 30 sutka həbs.
Yaxın üç gün üçün Rusiyanın 9 şəhərində müxtəlif aksiyaların keçirilməsi razılaşdırılıb. Amma Navalnı Nijni Novqoroddakı icazəsiz mitinqə qatılmağa qərar veribmiş.
Navalnı bu il iyunun 12-dən iyulun 7-dək Moskvanın mərkəzində sanksiyalaşdırılmayan kütləvi aksiyaya çağırış və hüquq mühafizə orqanlarına tabeçilik göstərməmək ittihamı ilə inzibati həbsdə yatıb. O, əvvəllər də dəfələrlə tutulub.
Səidə Hüseynova
