Miçiqan ştatı işğalçı Qarabağ rejimini tanıdı
ABŞ-ın Miçiqan ştatının Senatı işğalçı Dağlıq Qarabağ rejiminin “müstəqilliyini” tanıyıb. Amerika Erməni Milli Komitəsi bəyan edib ki, qərar Senatın 28 sentyabr iclasında qəbul olunub.
Novator.az-ın məlumatına görə, Miçiqan qondarma rejimi dövlət adına tanıyan 8-ci ştatdır. Rod-Aylend, Massaçusets, Luiziana, Men, Kaliforniya, Corciya və Havay ştatlarının qanunverici orqanları daha əvvəl belə qərar çıxarıb.
1988-ci ilin fevral ayında Ermənistan Azərbaycanın Dağlıq Qarabağ vilayətini özünə birləşdirmək üçün hərbi təcavüzə başlayıb. 1991-ci il sentyabrın 2-də Dağlıq Qarabağ vilayətinin və keçmiş Şaumyan rayonunun (Goranboy rayonunun tərkib hissəsidir) ərazisi “müstəqil dövlət” elan edilib. 1994-cü ilin may ayında elan olunan atəşkəsə qədər Ermənistan Dağlıq Qarabağı və onun ətrafındakı 7 rayonu işğal edib.
Sülh danışıqları 1992-ci ildə yaradılmış ATƏT-in Minsk qrupunun vasitəçiliyi ilə aparılır. ABŞ Rusiya və Fransa ilə birgə bu qrupa həmsədrlik edir. Həmsədrlərin indi danışıqlar masasında olan təklifinə əsasən, Dağlıq Qarabağ ətrafında olan rayonlar mərhələlərlə Azərbaycanın nəzarətinə qaytarılmalı və bölgənin yekun statusu müəyyənləşməlidir.
