İkinci ticarət festivalına sərəncam verildi
Prezident İlham Əliyev Bakıda keçiriləcək ikinci ticarət festivalı ilə bağlı sərəncam imzalayıb. Sərəncam bu il oktyabrın 15-dən noyabrın 15-dək davam edəcək festivalın təşkili üçün dövlət büdcəsindən, prezidentin ehtiyat fondundan Mədəniyyət və Turizm Nazirliyinə 1 milyon manat ayrılmasını nəzərdə tutur .
Novator.az bildirir ki, ticarət festivalları dövründə fiziki şəxslərin Azərbaycanda aldığı, istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisi qaytarılır. İlk ticarət festivalı aprelin 10-dan mayın 10-dək keçirilib. Festival ərzində alınmış mallara görə 172 obyektdə 22 min 112 elektron vergi hesab-fakturası tərtib olunub. Təsdiqlənmiş hesab-fakturaların 19 min 119-nu Azərbaycan vətəndaşları, 1734-nü əcnəbilər təqdim edib.
Dövriyyənin ümumi məbləği 15 milyon 471 min 805 manat, alıcılara qaytarılmış məbləğ isə 1 milyon 533 min manat göstərilib.
Mal alarkən ticarət festivalını deyil, “Tax Free” sistemini seçmiş əcnəbilərə ümumi məbləği 2 milyon 696 min manat olan 1130 elektron vergi hesab-fakturası təqdim olunub. Beləliklə, ümumilikdə əcnəbilərə ƏDV-nin qaytarılması məqsədilə məbləği 4 milyon 127 min 50,8 manat olan 3059 elektron vergi hesab-fakturası verilib.
“Tax Free” sistemi əcnəbilərin və vətəndaşlığı olmayan şəxslərin Azərbaycan ərazisində aldığı, istehsal, yaxud kommersiya məqsədləri üçün nəzərdə tutulmayan mallara görə ödədiyi əlavə dəyər vergisinin qaytarılmasını tənzimləyir.
