Qorxu parlamentin başını yedi
Yaponiyanın baş naziri, hakim Liberal Demokrat Partiyasının lideri Sindzo Abe sentyabrın 28-də parlamentin aşağı palatasını buraxıb. Novator.az-ın məlumatına görə, bu addım qonşu Şimali Koreyadan gələn nüvə silahı hədələri fonunda hökuməti möhkəmləndirmək zərurəti ilə əsaslandırılıb.
Növbədənkənar parlament seçkisi oktyabrın 22-nə təyin olunub. Sindzo Abe bəyan edib ki, 22 oktyabr seçkisi Yaponiyanı necə qorumaq sualına cavab seçkisidir. O, parlamentin aşağı palatasının yeni tərkibinin Yaponiyanın təhlükəsiz gələcəyinə yol açacağını vurğulayıb.
Nüvə silahına sahib Şimali Koreya rejimi son vaxtlar davamlı raket sınaqları keçirir, ABŞ-ı, Cənubi Koreyanı, Yaponiyanı vurmaqla hədələyir.
Yaponiya müxalifəti parlamentin aşağı palatasının buraxılmasını Şimali Koreya təhlükəsi ilə əlaqəli olmadığını bəyan edir. Müxalif liderlərin fikrincə, adı korrupsiya əməllərinə qarışan baş nazir nüfuzunu itirməkdə olduğu üçün qorxaraq seçkinin daha tez keçirilməsində maraqlıdır.
Parlamentin aşağı palatasının səlahiyyət müddəti əslində 2018-ci ilin dekabr ayında bitməli idi.
