Qar qışı qabaqladı
Ekologiya və Təbii Sərvətlər Nazirliyinin Milli Hidrometeorologiya Departamenti bildirir ki, sentyabrın 27-si gündüzdən 28-i səhərədək ölkədə hava şəraiti sərt keçib, şimşək çaxıb, arabir yağış yağıb, bəzi yerlərdə leysan xarakterli intensiv olub, yüksək dağlıq ərazilərə qar düşüb. İntensiv yağış nəticəsində çaylarda sululuq artıb.
Yağıntının miqdarı Bakıda və Abşeron yarımadasında 1-19, Lənkəran-Astara zonasında 14-150, Böyük Qafqazda 7-59, Mərkəzi Aran rayonlarında 7-19, Kiçik Qafqazda 3-18, Qazax-Gəncə zonasında 3-8 millimetr olub.
Quba və Qusarın yüksək dağlıq ərazilərinə qar yağıb. AZƏRTAC Quba Regional Hidrometeorologiya Müəssisəsinə istinadla xəbər verir ki, ən çox yağıntı Qubanın Xınalıq kəndinə düşüb. Kənddə qarın qalınlığı 12 santimetrə çatıb. Qırız kəndində 11, Qusarın Ləzə kəndində isə 2 santimetr qar qeydə alınıb.
Qarın yağması ilə əlaqədar şimal bölgəsində hava soyuyub, dağlıq ərazilərdə gecə saatlarında temperatur mənfi 3 dərəcəyədək aşağı düşüb.
